მართლმადიდებელი ეკლესია ღირს იაკობ ნიზიბიელს იხსენებს

ღირსი იაკობი, ნიზიბიელი ეპისკოპოსი. ფოტო: ღია წყარო

მართლმადიდებელი სამოციქულო ეკლესია 26 იანვარს ღირს იაკობ ნიზიბიელს მოიხსენებს. იგი გეფალელი (სომხეთი) მთავრის ძე იყო. მიუხედავად იმისა, რომ კარგი განათლება მიიღო, ამქვეყნიურ ცხოვრებაში სულის მისადრეკი ადგილი ვერ ჰპოვა და ნიზიბიის მახლობლად, უდაბურ მთებში განმარტოვდა.

უდაბნოში წმიდანმა უმკაცრესი ასკეტური ცხოვრება იტვირთა — იკვებებოდა მხოლოდ მცენარეთა ფესვებითა და ნაყოფებით, ემოსა თხის ტყავი, წელიწადის უმეტეს დროს ღია ცის ქვეშ ატარებდა, ზამთარში კი გამოქვაბულს აფარებდა თავს. მისი ცხოვრება განუწყვეტელი ლოცვით იყო სავსე. ასეთი ღვაწლისთვის ღირს იაკობს სასწაულმოქმედებისა და წინასწარმეტყველების ნიჭი მიემადლა.

ღვთის ნებით წმიდანი სპარსეთს მიაშურა, სადაც წარმართთა მოქცევასა და მართლმორწმუნეთა განსამტკიცებლად იმოღვაწა. ერთ-ერთი სასწაულით მან უსამართლო მსაჯული გამოაფხიზლა და უდანაშაულო ადამიანი იხსნა. იმპერატორ მაქსიმიანეს დროს ქრისტიანთა დევნისას ღირსმა იაკობმა მხნედ აღიარა სარწმუნოება.

დაახლოებით 314 წელს ნიზიბიის მცხოვრებლებმა იგი ეპისკოპოსად აირჩიეს. მაღალი საეკლესიო ხარისხის მიუხედავად, წმიდანმა ცხოვრების მკაცრი წესი არ შეცვალა და ღვაწლი კიდევ უფრო გაამკაცრა. მღვდელმთავარი იაკობი ნიკეის I მსოფლიო საეკლესიო კრების მონაწილე იყო და ერთგულად იცავდა მართლმადიდებლურ სარწმუნოებას.

წმიდანმა ნიზიბიაში გახსნა სკოლა, სადაც თავად ასწავლიდა. მისი ქადაგებები გამოირჩეოდა ზნეობრივი სიმაღლითა და გულწრფელობით. ღირსი იაკობი მშვიდობით მიიცვალა 350 წელს.

მართლმადიდებელ ჟურნალისტთა კავშირი წერდა, მართლმადიდებელი ეკლესია 23 იანვარს წმიდა გრიგოლ ნოსელის ხსენებას აღნიშნავს.

წაიკითხეთ ასევე