მართლმადიდებელი ეკლესია წმიდა ექვთიმე ღვთისკაცს იხსენებს

ექვთიმე ღვთისკაცი. ფოტო: მართლმადიდებლური ხატები

მართლმადიდებელი სამოციქულო ეკლესია 16 იანვარს წმიდა ექვთიმე ღვთისკაცს მოიხსენებს. დიდ ქართველ მეცნიერს, ისტორიკოსს, არქეოლოგს და ეროვნული საგანძურის დაუღალავ მცველს. წმიდა ექვთიმე თაყაიშვილი 1863 წლის 3 იანვარს დაიბადა. ბავშვობიდანვე მძიმე განსაცდელებით აღსავსე ცხოვრება ჰქონდა — მცირე ასაკში დაობლდა და ჯანმრთელობის მძიმე ტრავმაც მიიღო, თუმცა ეს ვერ გახდა მისი სულიერი და გონებრივი სიძლიერის შემაფერხებელი.

სწავლისა და მოღვაწეობის წლებში ექვთიმე თაყაიშვილმა განსაკუთრებული წვლილი შეიტანა ქართული ისტორიის, კულტურისა და სიძველეთა მოძიება-შესწავლასა და გადარჩენაში. იგი იყო საქართველოს საისტორიო და საეთნოგრაფიო საზოგადოების დამფუძნებელი და თავმჯდომარე, არაერთი მნიშვნელოვანი არქეოლოგიური ექსპედიციის ხელმძღვანელი და მრავალი უნიკალური ძეგლის აღმომჩენი.

წმიდა ექვთიმე აქტიურად მონაწილეობდა თბილისის სახელმწიფო უნივერსიტეტის დაარსებაში და იყო მისი პირველი პროფესორი. 1921 წლიდან 1945 წლამდე, ემიგრაციაში ყოფნის მძიმე პირობებში, ღირსეულად დაიცვა და უკლებლივ შემოინახა საქართველოს ეროვნული საგანძური, რომელიც სამშობლოში დაბრუნების შემდეგ ხალხს დაუბრუნა.

მისი ცხოვრება მაგალითია უანგარო მსახურებისა, ერთგულებისა და თავგანწირვისა სამშობლოსა და ეკლესიის წინაშე. წმიდა ექვთიმე ღვთისკაცი 1953 წელს გარდაიცვალა და განისვენებს მთაწმინდის პანთეონში.

2002 წლის 17 ოქტომბერს საქართველოს მართლმადიდებელი ეკლესიის წმიდა სინოდმა იგი წმიდანად შერაცხა.

მართლმადიდებელ ჟურნალისტთა კავშირი წერდა, გამოვიდა გაზეთ „საპატრიარქოს უწყებანის“ 2026 წლის პირველი ნომერი.