იერუსალიმის პატრიარქმა თეოფილე III-მ აფხაზეთის მთავრობის დელეგაციას უმასპინძლა

დავით პაცაცია თეოფილე III-ს შეხვდა. ფოტო: აფხაზეთის ავტონომიური რესპუბლიკის იძულებით გადაადგილებულ პირთა მინისტრის გვერდი

დღევანდელი დღე განსაკუთრებული და ემოციური აღმოჩნდა აფხაზეთის მთავრობის დელეგაციისთვის, რომელსაც იერუსალიმის პატრიარქმა, მისმა უნეტარესობამ თეოფილე III-მ, განსაკუთრებული სითბოთი უმასპინძლა. შეხვედრა ოფიციალური მიღების ფარგლებს სცდებოდა და გულწრფელ საუბრად გადაიქცა საქართველოსა და იერუსალიმს შორის არსებულ მრავალსაუკუნოვან ისტორიულ კავშირებზე.

შეხვედრისას დელეგაციის წარმომადგენლებმა პატრიარქს გააცნეს საქართველოს წინაშე არსებული გამოწვევები და ყურადღება გაამახვილეს ქვეყნის ოკუპირებულ ტერიტორიებზე არსებულ რთულ ვითარებაზე. აღინიშნა, რომ იერუსალიმის საპატრიარქოს თანადგომა ქართველი მრევლის მიმართ განსაკუთრებულად ფასდაუდებელია.

განსაკუთრებული ყურადღება დაეთმო იმ ისტორიულ მნიშვნელობას, რაც ქართველებისთვის წმინდა მიწაზე, ჯვრის მონასტერსა და მაცხოვრის ტაძარში, მშობლიურ ენაზე ლოცვის შესაძლებლობას აქვს. აღნიშნული ფაქტი შეფასდა როგორც საქართველოს სულიერი და კულტურული მემკვიდრეობის განმტკიცების მნიშვნელოვანი ეტაპი.

შეხვედრის მონაწილეთა განცხადებით, სწორედ ურთიერთპატივისცემით, სიყვარულითა და მეგობრობით არის შესაძლებელი წმინდა მიწაზე საქართველოს სახელის კიდევ უფრო განმტკიცება. მათ გამოთქვეს რწმენა, რომ საქართველოსა და იერუსალიმის პატრიარქების ერთობლივი ლოცვა-კურთხევით ისტორიული სამართლიანობა აღდგება და ქართველი ერი ერთიან და გაბრწყინებულ საქართველოში იცხოვრებს.

მართლმადიდებელ ჟურნალისტთა კავშირი წერდა, მარნეულისა და ჰუჯაბის ეპარქია განცხადებას ავრცელებს.

წაიკითხეთ ასევე