ორბანი: ქრისტიანები ერთმანეთს ხოცავენ, ევროპა კი მუსლიმებით ივსება

ვიქტორ ორბანი. ფოტო: oxu.az

უნგრეთის პრემიერ-მინისტრმა ვიქტორ ორბანმა გააკრიტიკა ევროპული ქვეყნების პოლიტიკა, რომელიც, მისი თქმით, რუსეთ-უკრაინის ომის ფრონტის ხაზზე ასობით ათასი ადამიანის დაღუპვის საშუალებას იძლევა, ამავდროულად, ისლამური სამყაროდან მილიონობით მიგრანტს უღებს კარს.

„მაინტერესებს, რა აზრი აქვს ქრისტიანი ევროპული ერები ერთმანეთს ასობით ათასობით ხოცავენ რუსეთ-უკრაინის ომის ფრონტის ხაზზე, მაშინ როცა კონტინენტის მეორე მხარეს სრულიად უცხო ისლამური კულტურის მილიონობით მიგრანტს ვუშვებთ? რატომ არის ეს კარგი ევროპისთვის? შეუძლია ვინმეს ამიხსნას ამის მნიშვნელობა? ეს არა მხოლოდ სამარცხვინოა, არამედ აბსოლუტურად არანორმალურია“, - იკითხა ორბანმა.

უნგრეთის პრემიერ-მინისტრმა აღნიშნა, რომ ევროპელი პოლიტიკოსები რეალურ ისტორიულ გამოწვევებს ვერ ამჩნევენ.

„შესაძლოა, უკრაინის კონფლიქტი ბევრისთვის ახლა მნიშვნელოვნად ჩანდეს, მაგრამ ის ჩვენი შვილებისა და შვილიშვილების მომავალს არ განსაზღვრავს. მათი მომავალი სრულიად სხვა კითხვაზე იქნება დამოკიდებული, რომელიც ხმელთაშუა ზღვაში 1400 წელია არსებობს - რომელი მიმართულებით განვითარდება ჩვენი ცივილიზაცია, ქრისტიანული თუ ისლამური?“ - ხაზგასმით აღნიშნა ორბანმა.

ადრე მჟკ-მა დაწერა, რომ ორბანის თქმით, ევროკავშირი უარყოფს ქრისტიანულ მემკვიდრეობას და ხელს უწყობს ლგბტ თემის წინსვლას.