ანგარიშში ნათქვამია, რომ ირანში ქრისტიანობა მსოფლიოს ნებისმიერ წერტილზე უფრო სწრაფად იზრდება

წმინდა თადეოზის მონასტერი. ფოტო: ru.irancultura.it

ხელისუფლების მხრიდან მკაცრი შეზღუდვებისა და სისტემატური დევნის მიუხედავად, ქრისტიანობა ირანში სწრაფად ვრცელდება. საერთაშორისო ადამიანის უფლებათა დამცველი ორგანიზაციის, „International Christian Concern“-ის მონაცემებით, ირანში ქრისტიანობა დღეს მსოფლიოს ნებისმიერ წერტილთან შედარებით უფრო სწრაფად იზრდება.

ქრისტიანული მისიის „ღია კარების“ მონაცემებით, 2014 წელს ირანში ქრისტიანების რაოდენობა დაახლოებით 370 ათასი ადამიანი იყო (მოსახლეობის დაახლოებით 0,5%). თუმცა, 2025 წლისთვის, ორგანიზაცია „Article 18“-ის მონაცემებით, ეს რიცხვი თითქმის გაორმაგდა და 800 ათასს მიაღწია.

ექსპერტები ამ დინამიკას ირანული საზოგადოების ნაწილის, განსაკუთრებით ახალგაზრდების, ოფიციალური სახელმწიფო იდეოლოგიის - შიიტური ისლამის - მიმართ იმედგაცრუებას მიაწერენ. ისლამური დოქტრინის, როგორც მკაცრი და რეპრესიული აღქმის ფონზე, ევანგელისტური ქრისტიანობა მიმზიდველია თავისი ღიაობით, პირად რწმენაზე აქცენტით და ცოცხალი საზოგადოებრივი ურთიერთობებით.

ქრისტიანობაზე მოქცევის ზრდამ ირანელი ლიდერების შეშფოთება გამოიწვია, რომლებიც ამას „უცხოური გავლენის“ გამოვლინებად და ეროვნული უსაფრთხოებისთვის საფრთხედ მიიჩნევენ.

მიუხედავად იმისა, რომ ირანის კონსტიტუცია ქრისტიანობას უმცირესობის რელიგიად აღიარებს, ისლამიდან სხვა სარწმუნოებაზე გადასვლა სისხლის სამართლის დანაშაულად რჩება, რაც სიკვდილით ისჯება.

„Article 18“-ის ანგარიშის თანახმად, 2022 წელს ირანში 134 ქრისტიანი დააკავეს საკუთარი რწმენის პრაქტიკისთვის, რომელთაგან სულ მცირე 30-ს თავისუფლების აღკვეთა მიესაჯა ან იძულებული გახდა, ქვეყანა დაეტოვებინა.

2022 წლის ბოლოს, სულ მცირე 17 ქრისტიანი იმყოფებოდა ციხეში, რომლებსაც 10 წლამდე თავისუფლების აღკვეთა ჰქონდათ მისჯილი „რეჟიმის საწინააღმდეგო პროპაგანდის“ და „ეროვნული უსაფრთხოებისთვის საფრთხის“ ბრალდებით.

Pew Research Center-ის პროგნოზით, 2050 წლისთვის ირანში ქრისტიანების რაოდენობა შესაძლოა 1,5-დან 2,2-ჯერ გაიზარდოს, სახელმწიფოს მხრიდან მიმდინარე ზეწოლის მიუხედავად.

მანამდე, მჟკ-მა დაწერა, რომ ირანში ორი ქრისტიანი კვლავ დააკავეს სახლში ღვთისმსახურებაში მონაწილეობისთვის.