საქართველოს საპატრიარქო ტახტის მოსაყდრის, მიტროპოლიტ შიოს ქადაგება

სენაკისა და ჩხოროწყუს ეპარქიის მიტროპოლიტი შიო. ფოტო: საქართველოს საპატრიარქო

30 ნოემბერს, თბილისის ყოვლადწმინდა სამების საკათედრო ტაძარში, სულთმოფენობიდან ოცდამეხუთე კვირას, საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი) ქადაგებით მიმართა მორწმუნეებს. მეუფემ სახარების იგავის მაგალითზე ისაუბრა იმ საფრთხეებზე, რაც მატერიალური კეთილდღეობის აბსოლუტიზაციას ახლავს და ხაზი გაუსვა, რომ ადამიანის ცხოვრების მთავარი მიზანი უნდა იყოს „ღმერთში გამდიდრება“.

ქადაგებაში მან ყურადღება გაამახვილა მდიდარი კაცის იგავზე, რომელიც მთელი ცხოვრება სიმდიდრის დაგროვებასა და მხოლოდ საკუთარ კეთილდღეობაზე ზრუნავდა, თუმცა მოულოდნელად სიკვდილის წინ აღმოჩნდა, რომ ყველაფერი ფუჭი იყო.

„უფალი არ ამბობს, რომ სიმდიდრე ცუდია — არასწორია მაშინ, როცა ის ხდება ადამიანის ცხოვრების თვითმიზანი,“ — აღნიშნა მიტროპოლიტმა. მისივე თქმით, თანამედროვე საზოგადოებაში, თუნდაც ადამიანთა უმრავლესობა არ იყოს დიდი ქონების მფლობელი, მატერიალური დოვლათისკენ სწრაფვა მაინც უმთავრეს მისწრაფებად რჩება, რაც სულის ცხონებას აფერხებს.

მეუფე შიომ განმარტა, რომ „ღმერთში გამდიდრება“ ნიშნავს იმ ყველა სულიერი ზნეობისა და სიყვარულის გამოვლენას, რაც ღმერთმა ადამიანში ჩადო. „ღმერთი სიყვარულია და ჩვენც მოწოდებულნი ვართ, ეს ტალანტი გავამრავლოთ. ეს არის ნამდვილი სიმდიდრე, რომელსაც მარადიული მნიშვნელობა აქვს,“ — თქვა მან.

მან ასევე შეადარა ადამიანის ცხოვრებაში დანიშნული დრო „ბეღლებს“, რომლებიც ან სულიერი ფასეულობებით შეივსება, ან ამაო საზრუნავებით. „მოვა დრო და თუ ჩვენი ბეღლები სავსეა იმით, რაც არავის სჭირდება, რა ღირს ასეთი ცხოვრება?“ — აღნიშნა მოსაყდრემ.

დღევანდელ ლიტურგიაზე სრულიად საქართველოს კათოლიკოს-პატრიარქ ილია II-ის ლოცვა-კურთხევით, გურგუჩიანების გვარი დალოცეს. მიტროპოლიტმა მათ სულიერი და ამქვეყნიური სიმდიდრე, მშვიდობა და გაძლიერება უსურვა.

მართლმადიდებელ ჟურნალისტთა კავშირი წერდა, საპატრიარქო ტახტის მოსაყდრემ, მიტროპოლიტმა შიომ სულთმოფენობიდან მეოცე კვირას ქადაგებით მიმართა მრევლს.