ეპისკოპოსმა გრიგოლმა წმინდა ლუკა მახარებლის სახელობის ტაძარში ლიტურგია აღასრულა

წალკის ეპისკოპოსი გრიგოლი. ფოტო: საპატრიარქოს საზოგადოებასთან ურთიერთობის სამსახური

2025 წლის 31 ოქტომბერს, წმინდა ლუკა მახარებლის ხსენების დღეს, თბილისში, ბაგებში მდებარე წმინდა ლუკა მახარებლის სახელობის ტაძარში, წალკის ეპისკოპოსმა გრიგოლმა (კაციამ) საღმრთო ლიტურგია აღასრულა.

ღვთისმსახურებას მრევლი და სასულიერო პირები ესწრებოდნენ. მათ საშუალება ჰქონდათ მიახლებოდნენ წმინდა ლუკა მახარებლის წმინდა ნაწილებს და ლოცვით მიეგოთ მონაწილეობა საზეიმო მსახურებაში.
აღსანიშნავია, რომ ტაძარი რვა წლის წინ ეკურთხა და საქართველოში პირველი ტაძარია, რომელიც წმინდა ლუკა მახარებლის სახელზეა აშენებული.

წმინდა მოციქული და მახარებელი ლუკა სირიის ანტიოქიაში დაიბადა. იგი განათლებული ბერძენი და პროფესიით ექიმი იყო. მაცხოვრის სწავლებით განმსჭვალული ლუკა პალესტინაში ჩავიდა და უფლის მოძღვრებას ეზიარა. შემდგომში იგი ერთ-ერთ 70 მოციქულთაგან გახდა და უფლის აღდგომის შემდეგ მის ქადაგებას მიუძღვნა ცხოვრება.

წმინდა ლუკა მახარებელი ასევე ცნობილია როგორც ღვთისმშობლის პირველი ხატების დამწერი და „საქმე მოციქულთა“ ავტორი. მისი სახარება, დაწერილი პავლე მოციქულის ხელმძღვანელობით, განსაკუთრებულად უსვამს ხაზს ქრისტეს კაცთმოყვარებასა და მოწყალებას.

მართლმადიდებელ ჟურნალისტთა კავშირი წერდა, ზუგდიდის პატრეპავლობის ტაძარში საკურთხევლის მოხატვითი სამუშაოები დაიწყო.

წაიკითხეთ ასევე