მართლმადიდებელი ეკლესია წმინდა მოციქულ იაკობ ალფესის ხსენების დღეს აღნიშნავს

წმინდა იაკობ ალფესი. ფოტო: მართლმადიდებლური ხატები

22 ოქტომბერს მართლმადიდებელი ეკლესია იხსენებს ქრისტეს ერთ-ერთ მოციქულს — წმინდა იაკობ ალფესს, რომელსაც ასევე იაკობ უმცროსად მოიხსენიებენ. იგი იყო მათე მახარებლის ძმა და კლეოპასა (ალფესის) და მარიას შვილი.

იაკობ ალფესი მოიხსენიება წმინდა წერილში მოციქულთა ჩამონათვალში (მათ.10:3; მარკ.3:18; ლუკ.6:15; საქ. 1:13), ხოლო მისი დედა, მარია კლეოპა, მოხსენიებულია იესო ქრისტეს ჯვარცმისა და აღდგომის მოვლენებთან დაკავშირებით — როგორც ღვთისმშობლის ახლობელი და ერთგული მსახური (იოან.19:25; მათ.27:56).

მოციქულ იაკობს „უმცროსი“ ეწოდა, რათა განესხვავებინათ იაკობ ზებედეს ძისგან, რომელიც პეტრესა და იოანე ღმრთისმეტყველის თანამოძმე იყო.

სულიწმიდის გარდამოსვლის შემდეგ იაკობ ალფესი იერუსალიმში ქადაგებდა, შემდეგ კი წმინდა ანდრია პირველწოდებულთან ერთად გაემართა მქადაგებლურ მოგზაურობაში — ედესაში, ღაზასა და ელეფთეროპოლში. საბოლოოდ, იგი ეგვიპტეში ჩავიდა, სადაც ქალაქ ოსტარცინში ჯვარცმით აღესრულა ქრისტესთვის.

მართლმადიდებელი ეკლესია წმინდა მოციქულ იაკობ ალფესის ხსენების დღეს ყოველწლიურად 22 ოქტომბერს აღნიშნავს, როგორც ერთგული მოწაფისა და მტკიცე მქადაგებლისა, რომელმაც სიცოცხლე თავდადებით შესწირა ქრისტიანული სარწმუნოების გავრცელებას.

მართლმადიდებელ ჟურნალისტთა კავშირი წერდა,  მიტროპოლიტმა ანდრიამ წმინდა ნინოს სახელობის ტაძარში საღვთო ლიტურგია აღავლინა.