სვეტიცხოვლობის ღვთისმსახურებას წმინდა სინოდი და საქართველოს მთავრობის მაღალჩინოსნები ესწრებოდნენ

მცხეთობა 2025. ფოტო: მცხეთის მუნიციპალიტეტი

2025 წლის 14 ოქტომბერს, საქართველოს მართლმადიდებელმა სამოციქულო ავტოკეფალურმა ეკლესიამ იზეიმა საუფლო კვართისა და მირონმდინარე სვეტის დღესასწაული – სვეტიცხოვლობა. მცხეთის სვეტიცხოვლის საპატრიარქო ტაძარში ამ დღისთვის აღევლინა საზეიმო ლიტურგია, რომელსაც თავმჯდომარეობდა საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი).

ღვთისმსახურებაში მონაწილეობდნენ წმინდა სინოდის წევრები, ადგილობრივი და სხვადასხვა ეპარქიების მღვდელმთავრები და სასულიერო პირები.

ლიტურგიის დასრულების შემდეგ მიტროპოლიტმა შიომ მრევლს დღესასწაული მიულოცა, ქადაგებით მიმართა და სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის ილია II-ის ლოცვა-კურთხევა გადასცა.

მეუფე შიოს თქმით, წლევანდელი სვეტიცხოვლობა განსაკუთრებული მნიშვნელობისაა, რადგან „2026 წელს საქართველო აღნიშნავს უდიდეს საიუბილეო თარიღს – 1700 წელს ქრისტიანობის სახელმწიფო რელიგიად გამოცხადებიდან.“

მიტროპოლიტმა შიომ ამასთანავე მიულოცა ანგელოზის დღე მარგვეთისა და უბისის ეპისკოპოს მელქისედეკს და მანგლისისა და თეთრიწყაროს მიტროპოლიტ ანანიას.

საზეიმო მსახურებას ესწრებოდნენ საქართველოს პრეზიდენტი მიხეილ ყაველაშვილი, პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი, თბილისის მერი კახა კალაძე, მთავრობისა და პარლამენტის წევრები, ასევე აფხაზეთის ავტონომიური რესპუბლიკის მთავრობის წარმომადგენლები.

სვეტიცხოვლობა ერთ-ერთი უდიდესი საეკლესიო დღესასწაულია საქართველოში. იგი ეძღვნება იმ ადგილს, სადაც, დაბრძანებულია იესო ქრისტეს კვართი. სვეტიცხოველი საუკუნეების განმავლობაში წარმოადგენს საქართველოს სულიერ, კულტურულ და სახელმწიფოებრივ ცენტრს.

მართლმადიდებელ ჟურნალისტთა კავშირი წერდა, მართლმადიდებელი ეკლესია სვეტიცხოვლობას აღნიშნავს.