თბილისის კლდისუბნის წმინდა გიორგის ტაძრის წინამძღვარი, დეკანოზი მიქაელ კაპანაძე გარდაიცვალა

თბილისის კლდისუბნის წმინდა გიორგის სახელობის ტაძრის წინამძღვარი, დეკანოზი მიქაელ კაპანაძე. ფოტო: ეპარქიის გვერდი

თბილისის კლდისუბნის წმინდა გიორგის სახელობის ტაძრის მრევლი ღრმა მწუხარებით იუწყება, რომ ტაძრის წინამძღვარი, დეკანოზი მიქაელ კაპანაძე აღესრულა. მამა მიქაელი მრევლისათვის იყო არა მხოლოდ მღვდელი, არამედ სულიერი მამა, მწყემსი და გზა სულიერი ცხოვრებისკენ.

მისი ცხოვრება გამორჩეული იყო ლოცვით, სიყვარულითა და დაუღალავი ზრუნვით – როგორც ტაძრისთვის, ისე თითოეული ადამიანის, განსაკუთრებით კი ბავშვების სულიერი აღზრდისთვის. მრევლი იხსენებს მას, როგორც თბილ, გულწრფელ და ნათელ ადამიანს, რომლის სიტყვა და ლოცვა ყოველთვის აძლევდა რწმენას და გამხნევებას.

„სიტყვები არ გვყოფნის იმის აღსაწერად, რამდენად განსაკუთრებული იყო ის ყველასთვის, ვინც ტაძარში მოდიოდა. მისი სიყვარული, ზრუნვა და ლოცვა მუდამ დაგვრჩება გულებში,“ — აღნიშნულია მრევლის განცხადებაში.

მრევლი ასევე იმეორებს საეკლესიო ლოცვას:

„წმიდათა თანა განუსუენე ქრისტე, სულსა მონისა შენისასა მიქაელს, სადა იგი არა არს ჭირი, მწუხარება, არა ურვა, არცა სულთქმა, არამედ სიხარული და ცხოვრება იგი დაუსრულებელი.“

პანაშვიდი ჩატარდება ორშაბათს, სამშაბათს და ოთხშაბათს კლდისუბნის წმინდა გიორგის სახელობის ტაძარში, ხოლო დაკრძალვა გაიმართება ხუთშაბათს.

ტაძრის მრევლი მამა მიქაელს მადლიერებით იხსენებს და სამძიმარს უცხადებს მის ოჯახის წევრებს, მეგობრებსა და ახლობლებს.

„ღმერთმა მიიბაროს მისი სული და დაუმკვიდროს მას საუკუნო განსასვენებელი წმინდათა შორის მართალთასა უკუნისამდე, ამინ.“

მართლმადიდებელ ჟურნალისტთა კავშირი წერდა, დიმიტრი უზნაძის ხსოვნა: 75 წელი ფუძემდებლური ფსიქოლოგის გარდაცვალებიდან.

წაიკითხეთ ასევე